(Díli, Fatuhada) 26 Marsu 2026 – Sekretaria Estadu Komunikasaun Sosiál (sigla-SEKOMS), husu ba ministériu hotu-hotu atu halo média ofisiál sira sai permanente, la’ós husi nomeasaun polítiku, atu garante kontinuidade dadus no informasaun iha instituisaun governu sira.
Tuir Sekretariu Estadu Komunikasaun Sosiál (sigla-SEKOMS) Expedito Loro Dias Ximenes, subliña katak média ofisiál iha ministériu hotu-hotu tenke sai funsionáriu permanente, tanba nomeasaun polítiku bele hamósu falta kontinuidade bainhira membru governu muda.
“Bainhira ministru ka sekretariu estadu remata nia mandatu, normalmente média ofisiál ne’ebé nomeadu politiku mós sai hamutuk, ne’ebé hamosu lakon informasaun importante no base dadus iha ministériu. Tanba ne’e, husu ba membru governu sira seluk atu konsidera média ofisiál sira sai permanente, atu bele asegura kontinuidade servisu, maski lideransa foun tama. Se média ofisiál ne’e permanente, maske lideransa muda, informasaun iha ministériu nafatin iha no bele kontinua jere ho di’ak,” dehan Sekretariu Estadu Komunikasaun Sosiál (SEKOMS) Expedito Loro Dias Ximenes, iha salaun Diplomata MNEC, 26/03/2026.
Sekretariu Estadu Komunikasaun Sosiál mós esplika katak pájina ofisiál ministériu nian iha papel importante atu disemina informasaun liu-husi plataforma online. Hanesan iha ministériu Defesa, média ofisiál presiza fó sai informasaun relevante kona-ba setor Defesa, inklui F-FDTL no diresaun sira hanesan Terrestre no Naval.
“Ho nune’e, jornalista sira la presiza buka informasaun to’o iha ministru, tanba dadus tékniku no informasaun institusionál bele hetan diretamente husi média ofisiál. Tanba ne’e, média ofisiál tenke hatene prepara komunikadu imprensa ho profesional atu distribui informasaun loos ba públiku,” esplika Expedito Loro Dias Ximenes.
Iha okiziaun ida ne’e SEKOMS esplika tan katak, jornalista mak ema ne’ebé loron-loron buka informasaun, rekolla dadus, hakerek notísia no liu husi prosesu editórial antes públika iha kanal komunikasaun. Enkuantu média ofisiál nia papel mak fó sai informasaun ofisiál husi instituisaun ho forma klaru no responsável.
“Fenómenu ne’ebé ladun di’ak, hatudu katak média ofisiál balun halo-an hanesan jornalista. Ha’u reafirma katak média ofisiál la’ós jornalista, maibé parte husi estrutura governu ne’ebé suporta komunikasaun institusionál.” nia deklara
Iha diskursu ba funsionáriu governu nia, SEKOMS informa tan katak, média ofisiál sira iha papel estratéjiku tebes iha era dijitál atu hadi’a imajen governu no hametin relasaun ho públiku. Sira konsidera hanesan “lian no matan” governu nian, ne’ebé iha responsabilidade atu rona no responde ba preokupasaun públiku ho profesionalizmu.
Entretantu husi rezultadu peskiza kona-ba persepsaun públiku, dadus ne’e la’ós de’it númeru, maibé mós reprezentasaun husi lian povu kona-ba desempeñu governu. Iha tinan 2023 to’o 2024, nivel satisfasaun públiku hasa’e to’o 61%, no lideransa Primeiru Ministru Kay Rala Xanana Gusmão hetan konfiansa 73%.
Iha peskiza tuir mai iha 2024 no 2025, rezultadu ne’e aumenta tan, ho desempeñu governu to’o 71%, no konfiansa ba lideransa Primeiru Ministru sa’e to’o 84%.
SEKOMS enfatiza katak média ofisiál presiza uza dadus hirak ne’e ho responsabilidade, atu analiza no responde ho honestu no profesional, hodi kontinua hadi’a servisu governu no hametin konfiansa públiku.
Jornalista :Madalena de Lima/Madalena Lopes
Editor :Francisco Pereira
