(Díli,24/03/2026) Palasiu Governu – Governu IX liu husi Sekretáriu Estadu Komunikasaun Sosiál (sigla-SEKOMS) Expedito Loro Dias Ximenes asina kontratu hamutuk ho média nain sira husi média nasionál, imprensa konvensionál no média plataforma dijitál no online sira ho objetivu atu fortalese relasaun no kualidade informasaun ba públiku iha tinan 2026.
Iha akordu ne’e, Sekretáriu Estadu Komunikasaun Sosiál (sigla-SEKOMS) kontinua fó apoiu ba setor média ho orsamentu jeral estadu (Sigla-OJE) tinan 2026maske montante tun oituan kompara ho tinan 2025.
“Asina kontratu ne’e envolve iha média imprensa ka jornal hamutuk nain lima, mak STL, Timor Post, Independente, Dili Post no (GMN)Diário Nacional. Aleinde ne’e, governu mós halo parseria ho plataforma dijitál online sanulu resin ida hodi fó sai informasaun ba sosiedade,” dehan Sekretáriu Estadu Komunikasaun Sosiál (sigla-SEKOMS) Expedito Loro Dias Ximenes hafoin remata asina kontratu hamutuk ho média na’in sira iha palasiu Governu Díli.
Nia salienta programa, Sekretáriu Estadu Komunikasaun Sosiál (sigla-SEKOMS) ne’ebé oferese ba média sira mak hanesan distribuisaun Jornal, programa Governu Rona, programa haree rasik no advertorial no Programa sira ne’e produz diretamente husi Sekretáriu Estadu Komunikasaun Sosiál (sigla-SEKOMS), ho kolaborasaun husi média sira atu halo transmisaun no publikasuan kada fulan.
“ami ne’e la’ós atu intervém ba liberdade imprensa. Governu garante nafatin respeitu ba independénsia no politika editorial média ida-idak. Objetivu prinsipal mak atu kria relasaun di’ak no konstrutivu entre governu ho média nasionál sira” nia argumenta
Nia reforsa,Servisu hamutuk ne’e atu fó espasu ba informasaun ne’ebé bazeia ba faktu no kualidade, la’ós atu halo influénsia ba konteúdo editorial média sira.
Entretantu durasaun kontratu ne’ebé Sekretáriu Estadu Komunikasaun Sosiál (sigla-SEKOMS) ho média na’in sira durante tinan ida, tuir orsamentu jeral estadu 2026. Ho orsamentu total dolares amerikanu $ 90.000.
Jornalista :Madalena de Lima Alves
Editor :Sandi Bello
