Covalima, Debos, 23-03-2026 – Munisípiu Covalima dadaun ne’e konsidera preparadu ona atu simu implementasaun poder lokál ka dezentralizasaun, tuir konfirmasaun husi Prezidente Autoridade Munisípiu (PAM), Miguel Armada Cardoso, preparasaun , lao hela ho di’ak liuhosi koordinasaun ho lideransa lokal no komunidade, ho objetivu atu hadia dezenvolvimentu no reforça autonomia iha nivel lokál.
Prezidente Autoridade Munisípiu Covalima (PAM), Miguel Armada Cardoso, iha entrevista eskluziva ho Jornalista Média Mudansa, hateten katak, governu munisípal halo ona reuniaun ho konsellu suku, konsellu konsultivu munisípal no realiza vizita traballu ba komunidade sira hodi fahe informasaun no hasa’e konsiensia kona-ba importánsia poder lokál.
“Munisípiu Kovalima preparadu ona. Ami identifika ona rekursu umanu no rekursu naturál sira ne’ebé importante atu sustenta dezentralizasaun,”dehan Prezidente Autoridade Munisípiu Covalima (PAM), Miguel Armada Cardoso iha hotel Ahi Narae, 23/03/2026.
PAM hateten katak Iha área rekursu umanu Covalima iha kapasidade ne’ebé sufisiente, ho ema ho kualifikasaun lisensiatura to’o rihun ida resin, mestradu atus ida resin no doutoramentu mós iha ona.
Enkuantu iha rekursu naturál, Kovalima konsidera riku ho mina, maganesia no ai-teka sira, ne’ebé bele sai potensial ba dezenvolvimentu ekonomia munisípiu nian.
Relasiona ho kritériu estadu nian, PAM esplika katak iha área tolu importante mak administrasaun, finansas no patrimoniu. Nia afirma katak munisípiu preparadu atu jere rasik rekursu sira ne’e wainhira poder lokál implementa.
“Governu planeia atu implementa poder lokál iha tinan 2027, no ne’e sei harii mós asembleia munisípal hanesan “parlamentu ki’ik” iha nivel lokál,” dehan PAM
Maski nune’e, PAM admite katak sei iha dezafiu sira, liuliu iha utilizasaun rekursu umanu espesializadu no jestaun rekursu naturál. Maibé nia konfiansa katak dezafiu sira bele rezolve liuhosi diskusaun no kolaborasaun entre parte sira hotu.
Relasiona ho dezentralizasaun ne’e PAM hateten katak iha estratéjia ida hodi tau prioridade mak kontinua halibur hanoin husi komunidade, veteranu, igreja no juventude sira, hodi forma planu dezenvolvimentu ne’ebé inkluzivu.
PAM mós husu ba povu Covalima atu hametin unidade no servisu hamutuk.
“Importante liu mak unidade, matenek no forsa hamutuk, Covalima bele hamrik mesak no hadia nia dezenvolvimentu rasik.” nia hakotu.
Jornalista : Francisco Pereira
