Covalima, Debos, 23 Marsu 2026 – Conselho de Imprensa de Timor-Leste (sigla-CI), liuhusi Diretór Diresaun Analiza Dezenvolvimentu Média (DADM) Alberico Junior da Costa, realiza treinamentu ida iha Munisípiu Covalima kona-ba jornalismu ambiental ba jornalista 12 ne’ebé mai husi media oin-oin iha Timor-Leste. Treinamentu ne’e ho objetivu atu enkoraja sidadaun sira atu hadomi no proteje ambiente.
Tuir Diretór Diresaun Analiza Dezenvolvimentu Média (DADM) Alberico Junior da Costa, hatete katak, treinamentu ne’e ho objetivu atu kapasita jornalista sira nia abilidade liuhusi matéria sira ne’ebé fó, atu nune’e iha futuru jornalista sira bele fó atensaun liu ba asuntu ambiental.
“Durante ne’e ita observa katak jornalista barak seidauk foku liu ba jornalismu ambiental. Tanba ne’e mak Konselhu Imprensa lori estratéjia atu hasa’e kapasidade jornalista sira iha área kobertura ambiental, atu bele enkoraja sidadaun sira hadomi no proteje ambiente,” dehan Diretór Diresaun Analiza Dezenvolvimentu Média, Alberico Junior da Costa iha Hotel Ahi Narae, foin lalais ne’e.
Iha oportunidade ne’e, Diretór mós hatete katak jornalista tenke relata faktu sira ho loos no rona parte hotu. Iha kazu hanesan isu poluisaun tasi, jornalista presiza entrevista fonte relevante sira atu asegura verifikasaun faktu.
Nia mos sublinha katak informasaun sira tenke konfirma uluk antes publika.
“Jornalista tenke iha objetividade no balansu, no sempre verifika informasaun antes publika. Liu tan, iha responsabilidade sosial no sensibilidade ambiental, tanba isu ambiental bele afeta moris ema barak no natureza,” nia hatete.
Iha sorin seluk reprezentante partisipante husi media Dili Post Ercia Freitas sente orgullu tebes bele partisipa iha treinamentu kona-ba jornalismu Ambiental.
“ha’u sente orgullu tebes bele partisipa iha treinamentu ida ne’e tanba durante ne’e ha’u nia beat foku liu ba iha asuntu ekonomia, seguransa, saúde, rede feto, maibe iha oportunidade ida ne’e ha’u bele kapasita ha’u nia koñesementu klean liu tan kona ba asuntu Ambiental nia” dehan Jornalista Dili Post Ercia Freitas.
Nia mós salienta katak, materia ne’ebé hetan nia sei implementa iha-nia servisu fatin, nune’e enkoraja sosiedade sira atu hadomi no proteje ambiente.
“Materia ne’ebé ha’u hetan husi formadór sira ba futuru ha’u sei implementa iha ha’u-nia servisu fatin, nune’e enkoraja ita nia sosiedade atu hadomi no proteje ambiente,” nia hatete.
Relasiona ho treinamentu ne’e Presidente Autoridade Munisípiu Covalima Miguel Armada Cardoso salienta katak nia prezensa atu fó informasaun ba média sira ne’ebé mai iha Munisípiu Covalima hodi hala’o sira-nia treinamentu iha area espesialidade jornalismu Ambiental.
“Treinamentu ne’e importante hodi kapasita jornalista sira liuliu ba kobertura jornalístiku kona-ba asuntu ambiental no foka ba proteksaun no hadomi ambiente”. Dehan PAM.
PAM mós salienta katak treinamentu ne’e koneksa ho futuru projetu Suai Supply Base (SSB) ne’ebé atu melhora kapasidade logístika no produzaun iha munisípiu, inklui atensaun ba sustentabilidade no proteksaun ambiental.
“Prezensa presidente autoridade iha ne’e hatudu suporta governu lokal ba inisiativa ne’e no fó importansia ba kolaborasaun ho média sira hodi informa komunidade kona-ba impaktu projetu ne’e.” PAM hakotu
Entretantu treinamentu ne’e hetan partisipasaun maximu husi Presidente autoridade Munisípiu Covalima, Diretór Diresaun Analiza Dezenvolvimentu Mídia, no mós Jornalista husi Dili Post, Lafaek News, GMN, ONE Timor, Hatutan.com, DFM, Radio Comunidade Comoro, Radio Liberdade, Radio Comunidade Taroman Suai inklui mós Media Mudansa.
Jornalista : Francisco Pereira
Editor : Sandi Belo
