(Díli) Farol- Kampu serbisu ne’ebé limitadu halo ema barak hasoru difikuldade atu hetan serbisu, ho ida ne’e negósiu sai alternativu ba Adolfu Martins hodi hatutan moris no sustenta nesesidade família.
Negosiante Adolfu Martins, hatete, hare’e ba kampu traballu ne’ebé mak limitadu, nia la tane liman ba estadu maibé kria rasik negósiu hodi sustenta moris loro-loron.
“Ha’u iha inisiativa rasik halo negósiu ida ne’e hodi sustenta moris loro-loron nian, tanba ita bele remata ona ita nia estudu, hare’e ba realidade iha Timor ne’e kampu traballu ne’ebé oferese ba joven sira limitadu tebes, entaun dalan ida ba ita joven sira lalika hein atu Estadu fó ba ita, liu husi dalan ida ne’e ita mós kontribui ona”, dehan Adolfu Martins ba Média Mudansa iha Farol, Díli, Kuarta, 01/04/2026
Nia hatutan, négosiu ne’ebé mak nia hala’o hanesan fa’an sigaru no kafe iha jardin Farol, Uma Laku.
“Ha’u hala’o negósiu fa’an sigaru no kafe iha jardin ne’e foin mak semana tolu (3), ha’u fa’an hahú husi dader to’o kalan maibé depende ba vendedór sira mai iha jardin ne’e fila hotu ona entaun ha’u mós fila ona ba uma”, Adolfu konta ba jornalista Média Mudansa.
Nune’e nia haktuir, negósiu ne’ebé nia hala’o hahú ho dólar haat-nulu ($40), no husi ida ne’e nia bele sustenta nia presiza sira no suporta nesesidade família.
“Ha’u hahú negósiu ne’e ho fundus $40, no osan ne’ebé ha’u hetan husi negósiu ne’e bele uza ba ha’u nia presiza loro-loron bele sustenta mós nesesidade família”, haktuir nia
Nia dehan, família sira apou tebes atividade ne’ebé mak nia halo tanba bele kontribui ba sustenta nesesidade família.
Enkuantu iha jardin Farol la’os de’it Adolfu mesak mak halo negósiu iha ne’eba, maibé iha mós negosiante seluk ne’ebé mak halo negosiu iha jardin refere.
“Iha ne’e la’os ha’u mesak mak fa’an, maibé, ami fa’an hamutuk nain lima (5), ne’ebé osan ita hetan mós dala ruma menus liu, maibé hare’e de’it ba estudante sira ne’e bainhira sira konsentra barak iha ne’e, entaun ami mós kontente tanba bele hetan netik osan ituan to’o kalan bele fila ba uma, ne’ebé loron ida minimu ha’u hetan dólar neen ($6) se sorte di’ak mak ha’u hetan netik dólar sanulu resin lima ($15)”, informa negosiante ne’e.
Maske ho negósiu ne’ebé mak ki’ik maibé Adolfu iha mehi no esperansa ne’ebé mak bo’ot, nia planu atu kria negósiu ne’ebé bo’ot liután iha futuru.
Nia dehan, dezafius ne’ebé nia hasoru mak iha fatin ne’eba maioria estudante de’it mak ba tu’ur ne’ebé sira sosa sasan tuir kbit estudante nian.
“Problema ne’ebe ha’u hasoru mak liu-liu fatin ne’e ema barak mak mai konsentra iha ne’e, maibé estudante de’it ne’ebé sira sosa mós tuir kbit estudante nian, maibé ha’u koko nafatin ho dezafiu sira ne’e atu motiva nafatin ha’u labele rende koko la’o nafatin hodi fó solusaun ba dezafiu sira ne’e”, tenik nia.
Jornalista: Zeferino Oliveira
Editora: Sandi Belo
