(Díli), Jardim 5 Maiu — Hosi Taibesi ba to’o haleu Jardim sira iha Dili laran, joven ida ho idade 20 Jovelino da Coelho Soares, leba nia has la’o hodi fa’an. Servisu ida ne’e la’ós deit atividade loroloron, maibé sai ona fonte moris prinsipal atu sustenta nia família.
Jovelino, orijinál husi Munisípiu Manatutu, agora dadaun hela iha área Kaikoli. Nia dehan katak desizaun atu fa’an iha dalan ninin mai husi nia inisiativa rasik, tanba nesesidade ekonomia uma laran.
“Moris di’ak la mai rasik, tenke buka ho esforsu,” dehan Jovelino ba Media Mudansa foin lalais ne’e.
Iha loron ida, nia bele hetan rendimento entre $4 to’o $5 dolares. Maibé iha semana ida, nia bele hetan to’o liu $100 dolares, depende ba volume fa’an. Osan nee uza atu sosa ai-han, mina no nesesidade importante seluk ba família.
“Ha’u hahu fa’an iha dader to’o kalan, fa’an plastik 2 ho folin 0,25 sentavus”, dehan nia
Jovelino hela hamutuk ho família uma laran nain haat, no nu’udar alin ikun, nia sente iha responsabilidade atu ajuda sustenta uma laran.
Maibé dalan moris nee mós lori konsekuénsia ida ne’ebé todan ba nia futuru edukasaun. Nia konfesa katak la konsege kontinua eskola tanba limitasaun ekonomia, no nia hakotu estudu iha klase 3 ensino primária deit.
Maski nune’e, Jovelino la para ho nia esforsu. Parte husi nia rendimentu, nia uza atu sustenta família, no parte seluk nia investe fila fali hodi sosa has atu fa’an iha merkadu taibesi no jardin sira
Istória moris Jovelino hatudu realidade joven barak iha Díli ne’ebé tama iha setor informal atu sustenta família, maibé iha tempu hanesan, lakon oportunidade atu hetan edukasaun formal.
Maske hasoru difikuldade, nia espiritu luta no responsabilidade ba família sai inspirasaun ba joven sira seluk katak, ho vontade forte no servisu maka’as, sei bele alkansa ba moris di’ak.
Jornalista/ Estajiadu : Inácio Silva/ Temotio da Costa
Editor :Felisberto Fernandes da Costa
