(Dilí) Balide- Sidade kapital Dilí la’os deit ejiste ema riku mak hela maibe iha sidade ne’e ejiste mos grupu vulneravel balun ne’ebe mak luta ba moris husi alternativu negosiu informal oioin, maske ho presu nebe’e naton maibe sei bele satan netik sira nia moris loron ohin no ba aban bainrua.
Negosiante Mario Bareito hatudu maske ho idade ne’ebe avansa ona maibe ne’e la’ós limite nia atu buka moris. Kontinua luta iha sidade Dili durante tempu naruk nia laran ho alternativu hanesan ai-leba (fa’an modo tasak) maske negosiu ne’e la’os ninia rasik hanesan fa’an ema seluk nia modo tasak hafoin nia hetan fila fali pursentu husi sasan folin ne’e nia fa’an.
“ tur deit iha uma la bele fó solusaun ka hetan osan tenki halo servisu “hateten negosiante Mario ba Jornalista Media Mudansa iha Balide foin lalais ne’e
Nia argumenta katak servisu nebe’e nia halo maske todan tamba tenki lao ain hodi haleu sidade Dilí nebe’e iha tempu udan no loron manas nia laran maibe ho folin modo nebe’e nia hetan kada loron husi dolares amerikanu $20 no nia sei hetan deit dolares amerikanu $5 husi ema nia sasan nebe’e nia fa’an.
“Ba han nian, dala ruma ha’u tenke ba patraun nia uma atu bele han” tenik nia
Fatin ne’ebe negosiante ne’e ba foti modo tasak iha Kolmera-Dilí hafoin ida ne’e tenki lao haleu Dilí laran no modo tasak ne’ebe nia fa’an ho deit presu dolares amerikanu $1, no osan ne’ebé nia hetan sei uza hodi atende nesessidade uma laran.
Negosiante Mario dadaun ne’e hela hamutuk deit ho nia feton iha nia uma ne’ebe lokaliza iha Becora-Bedois, nia relata foin lalais ne’e nia feen husik hela nia tamba aman maromak bolu ona maske hasoru situasaun difisil ida ne’e nia la kolen atu ultrapasa nafatin ba oin, servisu hahú husi dader to’o kalan depende ba sasan folin ne’ebe nia lori remata fila uma sedu sei wainhira la sasan folin la hotu sedu fila ba uma tarde.
“ha’u nia feen mate ona iha tinan hirak liu ba no ami nain rua mesak deit laiha oan” nia konta
Aleinde ne’e negosiante Mario hato’o nia preokupasaun ba governu ho difikuldade be’e mos iha área Bedois-Dilí tamba komunidade barak sei enfrenta ba problema ne’e .
Jornalista : Inácio Silva / Estagiadu, Olersio de Garvalho
Editor :Manuel Andrade
