(Díli), Taibesi — Okupa fatin ki’ik ida iha Merkadu Taibesi, estudante ida ho naran Marta dos Santos Tilman hamutuk ho nia parseiru luta ba estudu liuhosi fa’an produtu hanesan Supermi, sigaru no sasán seluk, ba Marta, negósiu ki’ik ida ne’e la’ós deit atividade tempu livre, maibé sai dalan importante atu sustenta nia estudu no ajuda família.
Marta, estudante semestre lima iha UNITAL (Universidade Oriental Timor Lorosa’e), hamutuk ho nia parseiru ne’ebé estuda iha Universidade Nasionál Timor Lorosa’e (UNTL), hahú sira nia negósiu husi tinan 2024.
Tuir Marta nia informasaun, rendimentu sira la estavel, iha loron di’ak, sira bele hetan entre $5 to’o $50 dolares, maibé iha loron balu, kompradór ladun barak no rendimentu menus tebes.
“Maski ema hola ka la hola, importante mak ita iha vontade no keta lakon esperansa,” dehan Marta ba jornalista Media Mudansa foin lalais ne’e.
Osan ne’ebé sira hetan, uza atu selu transporte loron-loron (bemo), propina eskolar, no ajuda família iha uma laran. Marta, ne’ebé orijinál husi Munisípiu Ermera, agora dadaun hela besik Taibesi atu fasilita nia atividade negósiu bainhira nia sai husi eskola.
Dezafiu boot ne’ebé sira hasoru mak falta fatin fa’an ne’ebé apropriadu no interese kompradór ne’ebé ladun konsistente, maski nune’e, sira kontinua halo esforsu ho determinasaun atu remata sira nia estudu no hadia futuru.
Istória Marta hatudu realidade estudante barak iha Díli ne’ebé la depende deit ba família, maibé kria dalan rasik atu sustenta edukasaun liu husi setor informal.
Nia parseiru agora dadaun remata ona faze teória iha nia estudu, no sira rua iha hanoin atu kontinua negosiu ne’e to’o remata estudu,
ba Marta, negósiu ki’ik ida ne’e la’ós deit kona-ba osan, maibé kona-ba esperansa.
Jornalista/Estajiadu : Juliana Paicheco/Olersio, Temotio
Editor :Felisberto Fernandes da Costa
