(Díli) Fundasaun Oriente – Ministru Komérsiu no Indústria (MCI), Nino Pereira, ofisiálmente lansa atividade Youth Co-Lab, ne’ebé organiza husi Alumni Parlamentu Foinsa’e Timor-Leste (APFTL) hamutuk ho ekipa HAKFOUN, ho tema Haburas Inovasaun Juventude iha Setór Produtivu ba Kreximentu Ekonomia Inkluzivu iha Timor-Leste, Atividade ida ne’e nune’e mos pretende hametin relasaun entre grupo juventude produtiva ho dezenvolvedores politika iha nivel governu.
Ministru Komérsiu no Indústria (MCI), Nino Pereira, fó apoio ba inisiativa husi Alumni Parlamentu Foinsa’e Timor-Leste (APFTL) iha atividade Youth Co-Lab, ho objetivu fó espasu no oportunidade ba grupo juventude produtiva atu espresa sira-nia inisiativa inovador iha setór produtivu.
“APFTL Iha iniciativa hanesan ne’e hatudu sentido responsabilidade sosial no presiza tau importánsia ba kualker atividade ne’ebé bele lori impaktu pozitivu ba foinsa’e sira. “Hau hanoin katak liafuan xave mak ita presiza haree,” dehan Ministru MCI iha Fundação Oriente, loron 26 fulan Junho tinan 2025.
Nia hatutan tan katak fó espasu ba grupo Joven Produtivu atu foti desizaun importante no kontribui diretamente ba dezenvolvimentu ekonomia nian, Juventude tenki hetan oportunidade atu participa no ativa iha prosesu dezenvolvimentu.
Iha fatin hanesan, Chefe APFTL, Deviana Sarmento, haktuir katak liu husi servisu hamutuk ho aliadu estratéjiku sira hanesan Asosiasaun de Jornalista Timor-Leste (AJTL), Timor-Leste Organic Fertilizer (TILOFE), Ermera Ai Kulat Mutin Organiku (EAMO), no Fórum Juventude Defisiénsia Ermera (FJDE), atividade sira ne’e konsidera hanesan espasu ida ne’ebé fó oportunidade ba grupu produtivu sira atu hamosu inisiativa no kontribui ba dezenvolvimentu sosio-ekonómiku.
“Aktividade ho naran Youth Co-Lab mak kolaborasaun foinsa’e entre feto no mane, atu halibur juventude foinsa’e sira no promove inisiativa iha setor produtivu. Atividade ne’e mos atu hametin koperasaun entre Governu, ajénsia relevante no grupu produtivu sira iha munisípiu sira, hamutuk ho APFTL. Atividade ne’e hetan financiamentu husi DFAT Australia, no servisu hamutuk ho Oxfam Timor-Leste, sai hanesan mata dalan ba instituisuan sira, Inisiativa ida ne’e mos parte ba kontinuidade husi tinan kotuk, ne’ebé halo ona iha Ermera liuhusi ezpozisaun, no agora sei kontinua iha Dili,” nia salienta.
Entretantu, iha feira ida ne’e, hetan partisipasaun husi grupu sira hanesan Timor-Leste Organic Fertilizer (TILOFE), Ermera Ai Kulat Mutin Organiku (EAMO) no Fórum Juventude Defisiénsia Ermera (FJDE), inklui mos estudante sira husi universidáde hotu-hotu iha Timor-Leste, hamutuk ho konvidadu sira ne’ebé envolvidu iha área dezenvolvimentu no inovasaun.
Jornalista : Inácio Silva/Estagiada, Maya Luanda
Editor :Manuel Andrade
